لاتدفش

واحد مات منذ ثواني .... فصعدت روحه... و في الطريق ...
شخص : وين رايح

المتوفي : طالع
الشخص : غير طريقك و اطلاع من هديك الجهة
المتوفي : ليش خاي
الشخص : هادا طريق المهمين بس
المتوفي : عفواً ... ماكنت بعرف...
يغير المتوفي الاتجاه آخذاً الطريق الآخر و بعد عدة أمتار
شخص آخر : هات الشهادة
المتوفي : ليش مين حضرتك
الشخص : اسكوت و لا تكتر غلبه ... ماشي بطريق ممنوع و بدو يتفزلك كمان
المتوفي : أول مرة بسمع فيه ملائكة أخلاقها متل حضرتك و متل اللي قبلك
الشخص : وينك ووين الملائكة لسه انت في حدود الدنيا ... نحن كلنا أرواح ممنوعة من الدخول
المتوفي : بس أنا توفيت من ثواني و ما معي شهاداتي ...
الشخص : الحق عليك كان لازم تكتب في وصيتك يحطوا معك الهوية و الشهادات اللي أخدنها في حياتك لتموت معك بعد مماتك ؟
المتوفي : تاني مرة بس أموت مرة تانية بكتب وصية متل اللي قلتللي عليها ... بس هلمرة الله يخلليلك أمواتك خليني أكمل طريقي ؟
الشخص : اش بدك تعطيني ؟ أحسن ما أحطك بالقبو ها !!!!
المتوفي : خود شوي من حسناتي !!!!
الشخص : طيب هات كيلو و غير اتجاهك لهداك الطريق !!
يذهب المتوفي لذاك الاتجاه .. و يبدأ الصعود .... بعد كام متر يأتيه صوت امرأة
المرأة : من حسنات الله يا أخي ....حسنة قليلة بترد ذنوب كتيرة
يلتفت فيجد امرأة متسولة
المتوفي : كمان هون !!! ... خدي هي كمشة حسنات ...و ادعيلي
يتابع الصعود ..... و فجأة تأتيه ضربة موجعة على كتفه
يلتفت ... يرى شخص له علامة جرح قديم على جبينه ممتد عبر أنفه و خده الأيسر
المتوفي : ليش عبتضرب ؟
قاطع الطريق : ليش دعست على خيالي ؟
المتوفي : يا عيني مادعست على خيال حدا ... أصلاً انت روح .. ومالك خيال
قاطع الطريق : عم بتبلاك تبلي ... صرلي يومين ما ضربت حدا ... كلهم عميطلعوا من غير طريق ... ما صدقت انك جيت .. لا تضيع وقت هات كل الحسنات اللي معك أحسن ما تشوف شي ما بيعجبك
المتوفي : طيب أنا بهيك حالة بدي أروح النار ...
قاطع الطريق : وين بدك تروح روح ...
و يضربه ضربة على رأسه فيغمى عليه .... و يسلبه كل حسناته و يدحش في جيبه كمشة من سيئاته و يدفشه للأعلى
يتابع طريقه غائباً عن الوعي .... و يصحى على صوت ملاك
الملاك : أبشرك أيها الانسان بالجنة
المتوفي : بس ما بقي عندي حسنات
الملاك : عند الله لا يضيع شيء و كل من سرق حسناتك و مالك و عملك و علمك و جهدك في الدنيا و في الطريق ازدادت حسناتك و ازدادت سيئاته ... فلا تخاف